Шу ўринда қайд этиб ўтамиз, қонунчилигимизда белгиланган “икки томонлама суғурта” тушунчаси одатда амалиётда “ўзаро суғурта” деб юритилади. Шу сабабли, бу икки тушунча бир хил мазмунга эга ва “UZARO” ўзаро суғурталаш билан шуғулланади десак хато бўлмайди.
“UZARO”нинг очилиши Ўзбекистонда ўзаро суғурта қилишнинг амалий механизми яратилганидан далолат беради. “UZARO” ўз фаолиятини икки йўналиш бўйича олиб боришни мақсад қилиб олган:
- Жамият аъзолари учун юқори сифатли ўзаро суғурталаш. Бунда хизматлар ўзаро ёрдам ва ўзаро ишонч тамойиллари асосида юритилади.
- Муҳтожларга ёрдам кўрсатиш. Бунда ёрдам турли хил хайрия акциялари ҳисобига амалга оширилади.
“UZARO”нинг асосий мақсади: аҳолига содда ва қулай ўзаро ёрдам тизимида иштирок этиш учун шароит яратиш ҳамда жамиятда раҳмдиллик хислатини шакллантиришга кўмаклашиш.
“UZARO” қуйидаги қадриятларга таянган ҳолда фаолият юритади:
- Ҳалоллик ва пок ният асосида, жамият манфаатини кўзлаб фаолият юритиш.
- Жамият аъзоларига адолат ва беғаразлик тамойиллари асосида ўзаро ёрдам кўрсатиш.
“Ўзингизга раво кўрганни ўзгага ҳам раво кўринг” деган эзгу қоида асосида инсонларнинг ҳожатини чиқаришга сидқидилдан кўмаклашиш.
